Nan Bacarito Nesnay
Warga Kota Padang Panjang
OPINI, kiprahkita.com - Dek mambaco berita baseri Inyiak Musa tentang 'Latoh' Marapi nan alun juo malandai, jo sebaran abu kapundan nan marato ka nagari sakuliliang di portal berita online baliau, yo bana mambuek rusuah ati Mak Etek Ujaik. Bantuak masin cuci se, puta ka suok puta ka kida.
Pindah-pindah duduaknyo di lapau Mak Kani sajak sanjo cako. Tiok sabanta nyo mancaliak kalua jendela, tu baliak lo ka dalam liak sambia geleang-geleang kapalo, alah ka tibo lo wakatu Sumbayang Mugarik. Inyo masih coitu juo baru.
Agak heran Mak Kani maliek ulah nyo tu. "Manga Ang Jaik," kecek Mak Kani, nan satolo rusuah maliek ulah kantinyo tu.
"Alun juo baranti kapundan ko turun lai ha...," sauiknyo ka Mak Kani sambia basegeh-segeh nio ka pulang.
Di sasoknyo kopi paik nan ampia abih tu ati-ati, takuik talulua lo dadak kopi nan dipasannyo sajak Sumbayang Ashar tadi.
"Den baliak lu yo, Kanti. Lah ampia lo mugarik," keceknyo sambia balari-lari 'doggy' ka rumahnyo nan di pu-un. Sambia mangode Mak Kani jo jarinyo kalo inyo kasbon lu, tando bisuak bayia.
Dalam perjalanan pulang, roman rusuah masih nampak jaleh di matonyo. Ditambah lo di Surau Koto Panurunan, alah mamuta kaset mangaji lo panguruih, tando 'wakatu' ampia masuak.
***
Masih tangiang-ngiang juo di Mak Etek Katubah Jumaik nan disampaian Ustat Kamal dari Baruah kapatang sampai kini, katiko Jumaik di Masajik Koto Panurunan. Alah ampia lo sapakan, lah ka ampia tibo lo ari Jumaik nan baru. Ado juo memori tu baru lai. Lakek bana kaji tu di kapalonyo.
Ustat Kamal bacarito panjang leba tentang sogok-manyogok jo hukumnyo sacaro Agamo Islam.
Indak pakai ba-bi-bu bagai baliau manarangkan kaji dalam katubahnyo nan padek tu do.
Tapi sabana manghujam ka ulu ati Mak Etek. Sahinggo, jikok satiok singgah pikirannyo ka situ, yo tabik nananyo.
"Ado 8 pakaro yang mangundang datangnyo bencana ka nagari awak ko," kato Ustat Kamal sangkaik tu.
"Satu, kufur nikmat, duo, kezoliman nan banyak, tigo, zina dan bla ... bla.. bla...," dak takana bana nan lain lai di banaknyo nan alah kapalo limo tu.
Sampai akhianyo masuak ka pakaro nan kasalapan, tentang kacurangan. Iko pulo nan jadi inti katubah.
Pakaro kecurangan ko sabana mambueknyo tasintak dek dihubuang-hubuangkan pulo dek liau jo kejadian bencana alam 'Latoh' Marapi nan taruih maintai.
Sabab, alah ampia tigo bulan, nan batuak Marapi ko alun juo tampak tando-tando malandai. Masih Siaga 1, kato inyiak Musa di portal online-nyo.
Iko bana nan jadi buah rusuahnyo sajak sangkaik tu. Salah satu bantuak kecurangan nan sadang angek nan dibahas katik tu, yo pakaro 'sumbangan' untuak pamiliah dari oknum caleg nan sato balago.
Pikiran Mak Etek malayang ka si Juned, kamanakannyo dari Partai Elok nan acok maingek an pakaro bahayonyo ruswah alias sumbangan ajaib alias sogok tu.
Padohal jaweknyo ka si Juned katiko tu alah meyakinkan bana.
"Oi Ned, waang ko anyia baru, jan aden lo ang aja, lai jaleh di ang.... lai tau ang dak ... apo bana guno pitih 'sumbangan' tu di urang nan manarimo," jaweknyo emosi.
"Bara banyak urang tabantu dinyo tuah," lanjuik Mak Etek sambia tagak pinggang manunjuak-nunjuak kalua pintu.
"Barokaik di urang untuak bali bareh, barokaik untuak bali ubek gaeknyo nan sakik, barokaik untuak balanjo sikola anaknya, barokaik ka pambayia utang bagai," tambah Mak Etek maraso di ateh angin.
Sabana manjadi jadinyo ka si Juned, nan guru ngaji di Surau Koto Panurunan sajak tamaik dari UIN Koto Pandakian duo taun nan lalu.
"Hah... barokaik?", tangango si Juned mandanga kato kato BAROKAIK, nan diulang-ulang Mak Etek ka inyo sambie mauruik-uruik dado.
Juned hanyo diam, dak namuah mamparunyam keadaan. Mamaknyo tu sadang 'lelah' mental nampak dinyo.
Tapi sagalo argumentasi Mak Etek tu langsung runtuah jo Hadits Nabi nan disampaian Ustat Kamal katiko katubah hari tu.
Sabana aluih main urang mambaliak an fakta, nan haram jadi halal nan halal jadi haram.
Dek kasantiangan mereka ko mamakai dalil 'aka' jo perasaan, tapi manyisiahan dalil agamo untuak mukasuik jaek.
Manggalaga suaro Ustat Kamal nan lulusan Kairo tu di ateh mimbar katiko manyampaian Hadits Nabi tentang sogok-manyogok ko.
"Bawasonyo urang nan manyogok jo nan manarimo, yo di narako, indak pakai badoso bagai doh! Tapi langsuang di narako! Keceknyo manutuik katubah partamo.
Pakaro ka salapan tentang kacurangan nan bisa maundang bencana ko, yo sabana datang dari Quran kironyo, kecek Mak Etek mambatin. Agak kuncun atinyo dek di saat yang samo, latoh Marapi alah maintai-intai sepanjang hari samanjak 105 hari nan silam.
Tapi sanjo nanko agak lain garaknyo dari nan taralah. Suaro muazin nan mangumandangkan Iqomaik Mugarik sakaliko, langsuang dituruiknyo di Mak Etek ka Surau Koto Panurunan nan dak jauah dari rumahnyo.
Mugarik ko sabana asiang dinyo. Agak cangguangnyo snek. Soalnyo inyo dapek saf partamo di lakang imam salasai bauluak.
Tampek nan jarang ditampek-i nyo walaupun sajak masih mangaji jo Nyiak Labai sangkaik sisuak.
ALLAHU AKBAR...
Suaro imam lembut manggetarkan ati Mak Etek, dek raso kenal inyo jo suaro urang takbiratul ihram tu.
Ondehei...Kironyo Juned nan manjadi imam, manggantian Nyiak Aguih, imam utama nan sadang bahalangan dek payi umroh.
Tapaso samakin dalam takuanyo ka tampek sujuik, dek pernah mangatoi si Juned masih anyia masalah agamo kapatangko.
Ondeeeh.***
WARNING
Membaca artikel ini dengan menggunakan Artificial Intelligent (AI) dan perangkat digital, belum tentu akurat dan sesuai dengan maksud artikel. Sebaiknya Anda mengerti Bahasa Minangkabau, ketika membacanya. Terima kasih.(redaksi)
0 Komentar