Alah Barangkek Kapa Si Juned

Nan Bacarito Nesnay

Tingga di Padang Panjang

OPINI, kiprahkita.com - Alah duo pakan labiah Si Juned indak singgah ka lapau Mak Kani nan biaso di singgahinyo, sabalun payi ma-aja ngaji di TPA Surau Panurunan.

Alah salamo itu pulo, inyo indak maisi wirid tahsin ditampek nan samo.

Antah sibuk antah sakik kolah kamanakan bujang Mak Etek Ujaik nan surang tu. Sahinggo alah jadi pakece'an urang inyo dilapau Mak Kani.

Hari masih sangaik pagi, tapi ujan abu masih taraso turun saminyiang bacampua kabuik garimih rapek. Tibo-tibo Mak Etek mancogok jo topi koboi, si patu jenggo jo 'gancu' (pangaik karuang dari basi) ditangannyo.

"Baa kaba si Juned kini, Wan?," tanyo Si Juih ka Mak Etek nan nampak takajuik dek baru sajo tibo di lapau, langsuang se ditodongnyo jo pertanyaan. 

Kalo diliek dari bunyi angoknyo, nampak bana siso latiahnyo pulang dari Pasa Sayua Ujuang dari samalam.

Dan takah taralah, tiok pukua anam pagi Hari Sinayan ko, biasonyo Mak Etek baru baliak 'mamakang' lado jo kantang di Pasa Ujuang, sajak pukua 1 malam tadi untuak dikirim ka Haji Ipin langganannyo nan di Pakanbaru. 

Maklum se, profesi 'kutu balai' alias spekulan kelas teri tu, alah ditekuninyo sajak masih bujang matah. 

"Handeh alun lapeh rangah den, alah batodoang sakali," jawek Mak Etek Ujaik sambia malatak an gancu di ateh meja satu nan biaso di tampek-i-nyo.

"Kopi sangah lah dulu,..takah biaso," katonyo ka Si Juih nan sadang mangocok teh talua pasanan Nyiak Aguih, nan dipasannyo sabalum Shalat Subuah cako, sabalum ma-imami jamaah di Surau Koto Panurunan. 

"Jadih... ," jawek Si Juih mahantian sabanta mambuek teh talua, langsuang mambuek-an kopi paik sangah untuak Mak Etek.

"Baa mantun..?," kecek Mak Etek mambukak carito. 

"Iyo, alah duo pakan dak do Si Jun singgah gai k amari, sakik lah nyo kolah,..?" Agak ado cameh si Juih samo guru ngaji jo tahsin kampuang nan ganteng tu dalam pertanyaannyo.

"Antah baa kolah, dak do lo waden dapek kaba dari nyo doh," jawek Mak Etek ka si Juih, sambia bajalan ka kamar ketek lapau Mak Kani nio bauluak dek inyo alun Sumbayang Subuah lai. Samantaro hari alah ampia pukua sangah tujuah. 

Indak sampai duo minik bagai doh, alah salasai sajo inyo sumbayang, yobana 'super kilat khusus' sumbayang amak tu.

Ondeyei gaek yo, apolah nan nyo baco kolah,  Basijungkek-patiang se nan nampak.

***

"Udaaaa... oi...udaaa..," tadanga suaro Si Rosna dari jauah mamanggia namo lakinyo nan sadang dalam langga.

"Manga Kak Roih ko,... mamakiak makiak se ha... ado apo?" kato Si Juih kalua manyongsoang bini Mak Etek nan bantuak di kaja wawau.

Serentak jo Mak Etek nan maloncek pulo kalua dari 'langga sumbayang' lapau Mak Kani dek saking takajuiknyo menyongsong si Rosna.

"Si Juned... Si Juneed..," keceknyo ciek-ciek dek masih sasak angok.

"Si Juned ... Alah barangkek kapanyo tadi...", kecek si Roih mambuek suasana lapau manjadi tagang, tambah dramatis jo sasak angoknyo nan masih kancang.

***

"Ondeeh Juneeeeed masih mudo ang yuaaaang, alah barangkek kapa ang naaak....," kecek Mak Etek taduduak di lantai sambia mararau kata-katai disuduik langga, marespon kato bininyo tu satangah dak picayo.

"Dari ma Kak Roih dapek kaba tu," tanyo Si Juih ka Si Rosna nan alah di duduak-annyo di kursi sambia maagiah minum aie putiah, dek nampak pucek sangaik mukonyo.

"Dari Nyiak Aguih tadi di Surau siap sumbayang subuah sabanta koha," jalehnyo ka si Juih.(BASAMBUANG)

WARNING

Membaca artikel ini dengan menggunakan Artificial Intelligent (AI) dan perangkat digital, belum tentu akurat dan sesuai dengan maksud artikel. Sebaiknya Anda mengerti Bahasa Minangkabau, ketika membacanya. Terima kasih.(redaksi)