Oleh Nesnay, Warga Padang Panjang
OPINI, kiprahkita.com - Sabana mete-mete Mak Kani sasudah pulang tarawiah malam ko, satibonyo inyo di lapau simpang warisan mandiang ayah bininyo tu.
Sabana tacangangnyo maliek kalakuan alumni Esempe angkatan '87 kawan-kawan si Ujaik nan masih ado di lapau alah ampia lo hari jam sangah sabaleh malam.
Disiginyo sado nan ado di meja makan, ondeh iyo bana mambuek naiak darahnya ka ubun-ubun.
Bakeh pabukoan nan tahidang banyak nan indak abih. Sagalo macam bantuak makanan aneh-aneh tumpah ruah bantuak kapa pacah siap dihampeh tsunami.
Alun lai bekas aie mineral nan banyak tasiso, mulai dari nan bantuak galeh sampai kabantuak boto,
mulai dari warna bening sampai nan warna karuah. Dari merek dalam nagari sampai ka merek lua.
Indak ketinggalan lo produk produk zi*nis Isra*l nan mereka sosok tanpa maraso basalah.
Handeh, sabana bi*gkaru**g gadang kalian mah, batin Mak Kani maliek kenyataan nan ado di hadapannyo sambia mambiak angok Panjang manahan emosi.
***
"Eh, alah pulang wan Kani mah," sapo si Cauak mangajuik-an Mak Kani nan sadang tapana maliek kondisi lapaunyo alah sarupo itu sambia maliek ka balakang.
"Baa, lai aman sumbayang tarawiah tadi wan, layi uwan labiah-an untuak awak ciek," lanjuik si Cauak mancubo bagarah ka Mak Kani nan tapaso galak sengeh dek masih shock dek Ulah si paja-paja tu.
"Labiah-an baa koha, jak bilo lo sumbayang bisa dilabiahan, di-ang!" sunguik Mak Kani ka si Cauak nan mangecek sambia maisok rokoknyo nan alah taujuang, basaratoan jo baun angoknyo nan alah takah baradiak-kakak jo baun asbak kayu usang.
"Jadi alun sumbayang ang sajak mugarik tadi lai, Uak," kecek Mak Kani baliak batanyo.
"Eeh, jan dijalehan bana, sagan lah den jo si Leni ha," jawek si Cauak sambia mandakek-an mukonyo ka Mak Kani bantuak urang babisiak, takuik tadanga di mantannyo katiko bapole di sempe sisuak.
Astaghfirullaah, batin Mak Kani maliek parangai si Cauak nan sajak ketek sampai alah gaek ko, indak ado perubahan elok nan bararti nan nampak dinyo doh. Malah samakin parah hari ka hari.
Sabana contoh nan sasuai jo pituah lamo urang Minang, 'ketek taraja-raja, gadang tabaok-baok, tuo tarubah tido'. Tapi kalo di-inyo khusus untuak nan porsi buruaknyo.
***
Palak bana hatinyo maliek parangai si Cauak Cs tu, sudahlah makan-minun basiso, wakatu sumbayang balalu baitu sajo (walau indak sado rombongan si Cauak nan coinyo).
Tapi judul gadang nan tapampang di spanduk katiko mereka ko bapoto basamo di tapi jalan gadang sore tadi katiko pembagian takjil, alah sabana jauah dari makna. Jauah panggang dari api !
Baa ka indak, di spanduk mereka tu tatulih kalimat koha.
'BULAN RAMADHAN BULAN PENGENDALIAN HAWA NAFSU, MARI KITA TINGKATKAN IMAN DAN TAKWA.
PERBANYAK AMAL SHOLEH, SALING BERBAGI DAN SENANTIASA MENDEKATKAN DIRI KEPADA ALLAH SWT.
***
Hei yei yo .. KARAMBIYAAAAA.**
.jpg)
0 Komentar