Nan Bacarito Nesnay
Tingga di Padang Panjang
OPINI, kiprahkita.com - "Nah.. Sampailah mukasuik, namonyo masuak 2 besar, takah nan lah samo wak liek di Pesbuk koha," tarang mak Etek ka Mak Kani, babusa-busa mancaliak'an gadang bana peluang Uwo Barain malenggang baliak jadi senator ka Senayan.
"Tumakonyo Liau 'manitip' ka Wan Cauak, ka maagiah waden PITIH sebagai ucapan tarimokasihnyo ka timses, nan alah sato mambantu baliau salamo kampanye kapatang," tarang Mak Etek ka Mak Kani jo tampang serius.
"Lumayanlah bisa bali bareh untuak di rumah jo lanjo si Rosna," agak malandai suaro Mak Etek, melow manyabuik namo bininyo.
"Ondeh sabana murah rasaki ang yo Jaik," sambuang Mak Kani ka Maetek.
Tiiiit..tiiit...tiiiit...
Tadanga bunyi kalason Onda Beat baru manapi ka lapau Mak Kani. Kironyo Wan Cauak nan tibo. Nan langsuang disongsong Mak Etek, jo hati babungo-bungo.
"Waden dak bisa lamo-lamo do Jaik, ko ado titipan Uwo Barain ka waang. Sambia maagiahan amplop ka Mak Etek, sambia langsuang tancap gas.
***
Dak karuan hati Mak Etek manarimo amplop kacang padi gadang tu do. Langsuang se dibukanya, di muko si Juih jo Mak Kani.
Kironyo amplop tu barisi kain saruang tungga, jo ucapan SELAMAT MENUNAIKAN IBADAH PUASA RAMADHAN senyo.
Sabana lameh Mak Etek, tasanda di kursi meja satu lapau Mak Kani. Disangko ka manarimo pitih kontan, ruponyo indak.
Wan Cauak nan tim inti dapek Onda Baru, awak nan tim hore ko, ditulak jo singkaruang.
Ondeh nasib....
Awak nan basitungkin karajo urang lain nan mandapek lanjo.
Dunia sabana indak adia, keceknyo samar-samar tadanga dek Mak Kani, sabalum inyo pingsan dek tensi naiak lo baliak.
Gubraaaaak.....(TAMAIK)
WARNING
Membaca artikel ini dengan menggunakan Artificial Intelligent (AI) dan perangkat digital, belum tentu akurat dan sesuai dengan maksud artikel. Sebaiknya Anda mengerti Bahasa Minangkabau, ketika membacanya. Terima Kasih
0 Komentar