Nan Bacarito Nesnay
tingga di Padang Panjang
OPINI, kiprahkita.com - Pagi ko, nampak bana Mak Etek Ujaik agak sandereh dari nan taralah. Topi itam branded nan biaso kamari madok, kini tatenggek rancak di kapalonyo arah ka muko.
Serasi bana jo warna sipatu lokak paragiahan Uwo Barain, nan dianjuangannyo duduak baliak di kursi senator Senayan perwakilan Ranah Minang.
Kopi itam sakarek paik nan biaso dipasannyo ka Si Juih, baganti jo teh talua lenggek khas lapau Mak Kani nan fenomenal.
Alah agak luponyo jo pasan Si Anjel, Mantari suntik Dusun Koto Panurunan, nan manyuruahnyo manjago tensi jan sampai ofset wakatu barubek damam kapatang.
Apolai faktor 'U' jo kebiasaannyo sebagai betmen kampuang, alias manusia malam alah tau urang sabalik.
"Coga bana Wan Ujaik kini mah," goda si Juih ka inyo nan langsuang dibalehnyo jo senyum cemerlang.
"Alah agak lamak badan den, hari ko," jaweknyo ka Si Juih, sambia maaduak aduak teh talua lenggek nan masih barasok jo sendok sambia sasakali menjilek tangkainyo.
'Wan Cauak alah tibo ka mari kolah Juih," Mak Etek bukak carito ka Si Juih, nan masih sibuk manyuci piriang bekas pical pelanggan nan balanjo pagi tadi.
"Baa tu, kamanga Wan Ujaik jo Wan Cauak. Ado janji memangnyo?" selidik Si Juih kepo.
"Hehe... adalah satu..", jawek Mak Etek ka Si Juih cengengesan co kalayi.
"Dak saba den lai ha, alah gata-gata tapak kida ko ha." Celetuknyo sambia gregetan manyosok teh talua sampai ampia abis sakali sosok.
"Ondeh ... dakek ka mandapek Ang mah Jaik!," salo Mak Kani dari dapua nan dari tadi mandanga cito urang baduo tu dari dalam.
"Handeh ado kanti mah...," sapo Mak Etek ka Mak Kani nan tuo sataun darinyo.
"Iyo,.. alah raso di tapi bibia cawan bana..," sambuang Mak Etek berbinar-binar.
"Kamanga ang jo inyo?," gantian Mak Kani nan batanyo sarupo pertanyaan bininyo tadi.
"Wa den dijanjian Wan Cauak 'sesuatu' dari Uwo Barain Senator awak tu ha, ado 'titipan' keceknyo." Jawek Mak Etek panuah harok.
"Soalnyo kan .. nan bajibaku mamasang spanduk jo mambagian kartu namo Uo Tambarain ka sado urang Dusun Koto Panurunan ko, kan waden !... kan nampak di Kanti mah," Jaleh Maetek serius bana sampai loncek-loncek ludahnya kamuko.
BASAMBUANG....
WARNING
Membaca artikel ini dengan menggunakan Artificial Intelligent (AI) dan perangkat digital, belum tentu akurat dan sesuai dengan maksud artikel. Sebaiknya Anda mengerti Bahasa Minangkabau, ketika membacanya. Terima Kasih
0 Komentar