Oleh Nesnay, Warga Padang Panjang
OPINI, kiprahkita.com - Sabana mandidiah dado si Juned mambaco berita nan sadang viral di dunia maya alah bara hari ko.
Tacilak bana dari rauik wajahnyo nan nampak mamerah padam, katiko manonton pidio pendek di Pesbuk, baduo jo Nyiak Aguih-Angku Labai-imam tuo surau kongsi Koto Panurunan.
Di pidio tu, ado saurang angku palo nagari subarang, nan diduga alah sabana marandahan profesi garin surau jo kato-kato nan indak patuik ditiru, bahkan didanga sado tingkek usia nan mangarati baso Minang.
"Alah malantak oto tagak paja tu mah, Ned," kato Nyiak Aguih geram, sambia maadok ka si Juned nan nampak geleang-geleang kapalo sasudah manonton pidio tu jo inyo.
"Sabana indak ado sipaik santun urang tu, sabagai tokoh panutan nan didahulukan salangkah jo ditinggikan sarantiang lai doh, sabana abis paja tu di mato den," lanjuik Nyiak Aguih ba api-api.
"Tigo puluah limo taun waden jadi garin surau gadang di tampek angku palo tu kini manjabat, yo baru di inyo kolah profesi garin ko dihino saroman tu," sasa Nyiak Aguih nan pernah jadi guru madrasah di nagari angku palo tu sangkaik masih mudo.
Sabalum inyo purnatugas 20 tahun nan lalu, sekaligus pulang kampuang ka Dusun Koto Panurunan paska istri baliau mangkat di sinan.
Nan kebetulan pulo, pas bana di tampek angku palo pamberang tu kini manjabaik.
***
"Baitu bana kuwaiknyo syahwat kekuasaan nan manguasoi hatinyo, sahinggo kamari manyewai se kato nan kalua dari muncuang nyo tu mpak di den," lanjuik Nyiak Aguih ka si Juned.
"Nan dicakak-i nyo urang politik, eh..nan dilantaknyo garin surau," tambah Nyiak Aguih jo suaro agak malandai manahan emosi.
"Cuboan banalah kini, alah sabaliak urang angkek suaro," katonyo geram.
Sambia maliek-an ka si Juned, komentar urang di pesbuk nan malendo co aie bah, mambaleh komentar padiah angku palo tu jo komentar padeh pulo nan baragam.
Kaolah.
***
Taibo bana atinyo gakti. Soalnyo, tabayang dinyo baliak almarhumah istrinyo nan sakampuang bana jo angku palo nan panaiak gulo tu.
Urangnyo penyayang jo panyantun, disukoi ampia satiok kalangan. Padohal inyo hanyo guru ngaji biaso di Surau Gadang tampek Nyiak Aguih jadi garin dahulu.
Indak manyangko Nyiak Aguih kalo kato rasis nan disampaikan angku palo tu, takah itu bana.
Sapuluah tahun inyo jadi kapalo madrasah merangkap garin sekaligus imam di Surau Gadang tampek angku palo tu manjabaik, yo nan sakaliko agak manusuak ka jantuangnyo.
Tapi inyo sadar, inyo kini hanyolah saurang garin, nan dak bisa babuek banyak selain maangkek kaduo tangan sambia mangadu ka Allah. Badoa.
Hanyo kapado Allah, inyo mambatin.
'Ya, Allah.. hanyo kapado Engkau ambo kadukan ulah angko palo nan panaik darah tu, sa sungguahnyo, Engkau Maha Adil dan Maha Bijaksana dalam maagiah pelajaran'.
Aamiin.
Tutuiknyo sambia maapuih aie mato nan alah mulai manitiak di tapi matonyo.***
0 Komentar