Mausie "Malaikat Imut"

Oleh Nesnay, Warga Padang Panjang

OPINI, kiprahkita.com - Agak marusuah juo hati Si Juned maliek jumlah jamaah di Surau Koto Panurunan sajak patangahan puaso sampai hari ka 19 ko.

Baa ka indak, suaro khas anak-anak di baris balakang jo ragam parangainyo, kini nyaris indak katangaran. 

Baitu pulo jo jamaah 'musiman' nan mudo aluuun, tapi ketek alah talonsoang. Alias pemuda matah.

Indak surang-alah juo dari mereka ko nan betah 'ngetem' agak sacah di surau tu lai, atau paliang indak main di pakarangan sambia kongko-kongko sasamo gadang sampai Imam Tarawiah salam.

Alah sabana taraso langangnyo, sabana mambuek 'dingin' tekong urang manggaleh nan sabalumnyo lai lasuah bajua-bali.

Taingek bana dinyo hariak gadang Gaek Pudin ka mereka ko katiko patangahan puaso kapatang. 

Sabana emosi baliau maliek kalakuan anak-anak nan dianggapnyo alah sabana indak bataratik di dalam surau.

"Woi anak-anak gal*dia, bisa dak kalian tanang! Alah bak cando pasa surau ko kalian buek," keceknyo sangkaik tu sambia maledak-an emosi nan salamo ko nampak bananyo tahan.

"Kalau ka indak kasumbayang kalian, ancak kalian bakirok jauah-jauah dari siko," sambuangnyo sambia manapuak mimbar jo muko merah padam.

Sakatiko tu, yobana tadiam sado umaik nan hadir mandanga suaro manggalaga gaek lansia bakeh atlit tinju di maso jayanyo tu.

Ditambah pulo inyo mahariak pakai mic 'double' untuak lua jo dalam ruangan. Tentu sajo keadaan manjadi sangaik mencekam.

Takalenjek gadang lah Si Juned nan sadang menjalankan katidiang infak, nan pasbana lo katiko tu nyo lewat di muko coroang toa bagian dalam.

Astagfirullahal'azhiim, batin Si Juned mancaliak keadaan tu spontan.

"Sabana dak tau jo Ampek kalian ko doh, alah ilang Minang kalian, tingga se kabau lai," lanjuik gaek uzur tu jo angok barek, naiak turun.

"Bantuak indak diaja se kalian di rumah jo di sakola, mah!," sindianyo sambia maadok ka hadirin nan nampak manakue indak berani maliek matonyo.

Ditangkoknyolah saurang anak ketek saumua SMP nan nampak dinyo paliang rusuah diantaro anak nan lain.

"Ang, anak sia, bagaluik jo mamakak se ang sajak tadi nampak di den," keceknyo ka Si Idaik, anak babadan gaboh nan dak bisa lari dek tangannyo alah di pilin Gaek Pudin.

Si Idaik tadiam, indak barani manjawek kalo inyo anak si Udin Cauak nan kebetulan bana, Si Udin Cauak ko anak pulo dek gaek Pudin.

"Baa tu anok se ang," sasaknyo ka Si Idaik mangariti.

Tapi tanpa disadarinyo, sarentak pulo lah jamaah basorak manjawek jo suaro kareh kalo anak nan sadang di interogasinyo tu anak Si Cauak alias cucunya surang.

Handeh. Mandeh. Malu dak kama ka diandok-an.

Sabana tabata-bata lah gaek nan mulai didik tu mancaliak respon jamaah ka inyo. Sampai inyo kahilangan kato-kato. Jo salah tingkah.

Samantaro Si Cauak nan ditunjuak jadi petugas keamanan surau salamo Ramadhan ko. Alah kabur labiah dulu antah kama, sabalum inyo kanai 'rambah' pulo dek urang gaek kanduangnyo tu nan nampak basigageh kalua surau mancari-cari bangkainyo.

Ondeh ... salamaik lah Si Cauak malam tu, alah lolosnyo dari amuak gaeknyo nan sabana parabo.

Onde-mande.

***

Surau Koto Panurunan ko katiko full hanyo bisa muek duo shaf sajo barih laki-laki jo ciek shaf barih padusi.

Tapi malam ka 19 kini, tampak bana mangalami 'kamajuan' nan signifikan menjalang putaran katigo Ramadhan 1445 ko.

Jemaahnyo sabana maju ka muko, tapi malah lowong di balakang. Alias bakurang taruih-manaruih.

Iyo sabana langang. Bisa dihituang jo jari se lai. Indak sampai sakodi bagai do, takah kapatang-kapatang ko sabalum insiden jo Gaek Pudin.

Indak bisa lo dipastikan kama anak-anak tu kini. Apakah mereka mengalami trauma atau memang inyo bana nan maleh ka surau jo sagudang alasan.

Jikok nan pemuda labil tu, yolayi bisa diprediksi kama se rute desersinyo (kabur dari solat tarawiah), sasudah mintak ijin di rumah ka payi ka surau.

Lain pulo jo para Gen-Z sebagai generasi pendatang baru, nan tibo-tibo malah mahilang baitu sajo tanpa jejak dari barisan shof paliang balakang.

Kalau anak mudo labil tu dipakiroan pai bapole ka pasa kuliner dan sekitarnyo, nan bocil-bocil tu barangkali ngetem di kisaran main gim online di lapau-lapau atau di warnet nan babukak sampai laruik malam. 

Takah alah jadi kurenah wajib bana sacaro turun-temurun sikon saroman tu. Sabana mambuek rusuah urangtuo di rumah, indak sadar alah acok tagijau dek anak.

***

Agak lamo manuang Si Juned malam ko katiko taingek dinyo sunnah Nabi Muhammad SAW tentang upayo baliau mambuek anak-anak betah barado di dalam surau atau masajik.

Suaro senda gurau mereka tu alah saumpamo "suaro malaikat" nan sadang bahagia.

Suaro harapan bagi kejayaan umat Islam di maso nan akan datang. Sahinggo indak buliah dirusak, apolai sampai dipatahkan.

Muhammad Al-Fatih, penakhluk Konstantinopel (Turki) mengatokan: “Jika suatu masa kamu tidak mendengar gelak tawa anak-anak, riang gembira di antara shaf shalat di masjid-masjid, maka sesungguhnya takutlah kalian akan datangnya kejatuhan generasi muda di masa itu."***