Oleh Nesnay, Warga Padang Panjang
OPINI, kiprahkita.com - Alah ampek bulan Marapi ko dikuhua. Sampai hariko alun juo tampak sakiknyo ka mareda lai do. Alah baragam muntahan material nan dikalua-annyo, dari asok putiah bau balerang manyangek, sampai ka abu kapundan itam nan pakek.
Yolah siliah baganti nyo ma-ampia ka sabalik nagari. Indak sajo malampok nagari nan tadakek, bahkan sampai pulo abu tu ka tampek nan jauah bagai. Tagantuang kama arah angin nan mambaok.
Indak sakali duo kali Bandara BIM di Padang Pariaman tu tapaso batutuik, dek jauahnyo abu tu pimain, tabaok tabang angin nan bakisa.
Tapi hari Rabaa (27/3) kapatang, untuak kasakian kalinyo, Dusun Koto Panurunan nan mandapek rasaki curahan kapundan nan agak taba dari nan taralah.
Dek saking tabanyo, iyo bana basisasak urang pagi-pagi ma idok-i abu nan naiak, dek onda jo oto nan lalulalang.
Sabana marasai urang nan indak pakai masker dibueknyo. Apolai petugas jalan raya nan tajebak dilema, pilihan iduik sebagai aparaik pengabdi masyarakat nan dak punyo banyak pilihan dalam bakarajo, kecuali harus patuah jo parintah atasan.
Baa lai.
***
Dari jauah nampak di Mak Etek anak sikola alah banyak bakaliaran di trotoar jalan gadang. Padohal hari masih pagi baransua kasiang.
Agak nyo anak-anak tu disuruah pulang dek gurunyo dek kapundan nan turun sangaiklah taba, batinnyo surang.
Sambia maliek-liek sapanjang labuah jo bangunan sakuliliang alah bawarna kulabu rato, basalimuik kapundan aluih siso latuih gunuang Marapi tadi malam.
Panjang bana pangana Mak Etek maliek kondisi takah iko. Takana dinyo peristiwa tragis waktu partamo kali gunuang ko aktif di awal bulan desember silam. Katiko tu keadaannyo, yo sabana mancekam.
Untuak partamo kalinyo setelah tahun 1970-an, Gunuang Marapi awak ko baliak mamakan korban akibaik erupsi. Bahkan lebih tragis, sampai 24 urang maragang angok.
Kok taingek dinyo peristiwa tu, sabana tagak bulu roma kuduaknyo. Tasirok darahnyo, sampai badaguak kancang bunyi jantuangnyo.
Sabana trauma nyo mancaliak pidio pendaki nan viral mintak tolong sangkaik tu, samantaro badannya alah anguih kanai hawo angek akibaik erupsi dahsyat nan dak sempat tailak-an.
Sabana tragis.
***
Samantang inyo dalam perjalanan pulang ka rumah sasudah mamakang kantang jo lado di pasa sayua Ujuang. Tadanga dinyo urang alah abang se di surau pasa.
Tapi dicaliaknyo labiah dakek, ruponyo, yo indak takah nan taralah kunjungan umaik ka surau tu do. Sakaliko dicaliaknyo banyak urang nan antrian bauluak, samantaro di dalam surau alah hampia panuah urang menunggu qamaik.
Tamasuak si Udin Cauak, pareman kutip keamanan pasa, nan alah tagak paliang kida di shof muko di sabalah Mak Kani nan takah biaso balanjo di Pasa Sayua Ujuang untuak kaparaluan lapaunyo.
Sabana panuah sasak Surau Pasa sakaliko nampak dinyo jo jamaah sumbayang luhua. Sampai dipakiroan-nyo mungkin ado duo 'shift' urang sumbayang kini mah.
"Mungkin shift kaduo awak lai mah Jaik," kecek Mak Piyan ka Si Ujaik nan masih bausaho manarobos masuak kadalam untuak mandapek tampek sumbayang.
"Oi jaik, oi Jaik...," sorak Mak Piyan ka Mak Etek nan alah berhasil merangsek kadalam. Dak tadanga dinyo suaro Mak Piyan lai, dek urang alah tagak sadonyo.
Tapi inyo yo sabana baruntuang. Dek lai pandai basilingkik, dapek juonyo shof partamo dilakang imam.
Alhamdulillah. Rasaki indak kama.
***
Akhianyo siap juo Sumbayang Luhua shift partamo. Salam suok salam kida, Mak Etek Ujaik langsuang bagageh kalua, tapi tahalang jamaah lain nan masih zikir.
Sampai inyo disorak an dek Mak Piyan panjago toilet surau jo suaro langkiang dari lua.
"JAIK, LAI BAULUAK ANG CAKO!?", Mandapek pertanyaan saroman tu, spontan saluruh mato jamaah, mancaliak tajam ka si Ujaik.
Tabik paluah dingin Mak Etek Ujaik dek pertanyaan Mak Piyan tu.
Soalnyo, Dek tadi basigageh sajo masuak demi mandapek-an shof sumbayang, baru takana dinyo kudian kalo inyo alun Bauluak (wudhuk) lai.
"ASTAGHFIRULLAAH," Keceknya siap tu sambia manapuak kaniang.
"LUPOOOOOO... DENAI", salah tingkahnyo dak tau kama muko ka diandok-an.
Handeeeeh.***
.jpg)
0 Komentar